Spider-Man

Spider-Man (cognossût in Italie ancje cul non Uomo Ragno, a la letare Om Ragn), alias Peter Benjamin Parker, al è un personaç dai fumuts merecans creât di Stan Lee (tescj) e Steve Ditko (disens) e publicât de Marvel Comics. La sô prime aparizion e je in Amazing Fantasy (Vol. 1) n. 15 dal Avost dal 1962.

Tai media, Peter Parker al è un vuarfin cressût dai barbis May e Ben a New York daspò de muart dai siei gjenitôrs Richard e Mary Parker. Lis sôs storiis a si davuelzin tal mont de adolessence e a an tancj personaçs secondaris tant che Flash Thompson, J. Jonah Jameson e Harry Osborn, interes romantics tant che Gwen Stacy, Mary Jane Watson e Black Cat, e nemîs tant che Goblin, Doctor Octopus, Venom e tancj altris. Te storie de sôs origjins, Peter al oten podês ecezionâi par vie de morseade di un ragn radioatîf; chescj a son principalmentri rimpinâsi su mûrs e sofits, fuarce e agjilitât soreumanis e capacitât di rilevâ i pericui in gracie al so Spider-Sense "sens di ragn". In plui, a si costruìs ancje dispositîfs par trai telis di ragn artificiâi montâts tes conolis. Daspò de tragjedie personâl di so barbe Ben, Peter al à tacât a doprâ i siei podês par combati il crimin divignint il supereroi Spider-Man.