Lotto er eit pengespel. Det går ut på å gjette sju tal som ein trur skal vinne, og ein må betale for å spele. Dersom ein gjettar riktig kan ein vinne pengar.
Lotto blei starta i 1986, og det er det største pengespelet i Noreg. Lotto blir drive av selskapet Norsk Tipping. Det er den norske staten som eig Norsk Tipping.
Aldersgrensa for å spele Lotto er 18 år.
Lotto er eit spel med tal. Det gjeld å tippe sju tal mellom 1 og 34. Ein må betale for å spele.
Kvar veke er det ei trekning der dei finn sju nye tal. Det skjer med ei gjennomsiktig maskin. Inni ligg ballar med kvart sitt nummer frå 1 til 34. Det blir trilla ut sju ballar med tal på. Dei sju tala blir kalla ei rekke eller ei Lotto-rekke. Lotto-trekninga blir vist på nett.
Førstepremien går til den eller dei som har gjetta alle dei sju vinnartala. Det finst også andre-, tredje-, fjerde- og femtepremie. Om ein får førstepremien kan ein vinne mykje pengar, ofte fleire millionar kroner. Dei andre premiane er mykje mindre, og det er mange som vinn same premie.
Ein spesiell type Lotto blir kalla Vikinglotto. Der er det folk i ti land som er med på trekninga: dei fem nordiske landa, pluss Estland, Latvia, Litauen, Belgia og Slovenia.
Når det blir trekt sju forskjellige tal mellom 1 og 34, så kan dette skje på over 5 millionar ulike måtar. Derfor er det veldig liten sjanse for å vinne førstepremien i Lotto.
Heilt presist finst det 5 379 616 ulike Lotto-rekker.
Halvdelen av pengane som folk bruker på Lotto, går til premiar. Resten går til Norsk Tipping og Norsk Tipping sitt overskot. Overskotet blir også omtalt som tippemidlar. Tippemidlane blir mellom anna delte ut til idrettslag og kulturliv. Alle som organiserer ting som fotball, musikk og teater kan søke om å få litt av pengane.
Om ein vinn i Lotto, kan ein få mykje pengar. Men for å vere med, må ein også bruke pengar. Nokre få av dei som deltek i spelet vinn premie. Alle dei andre tapar pengane dei har brukt.
Lotto kjem frå Italia på 1500-talet. Der blei regjeringa skifta ut kvart år. Fem nye medlemer blei trekte ut tilfeldig mellom nitti menn frå adelen. Då starta folk å vedde om kven som kom til å bli trekt ut neste gong.
