Roberto González-Quevedo González (Palacios del Sil, 1953) ye antropólogu, filósofu, escritor y doctor n’Antropoloxía Cultural pola Universidá Autónoma de Madrid y doctor en Filoloxía Hispánica pola Universidá d'Uviéu. Como académicu de númberu de l’Academia de la Llingua Asturiana dedica dende la so entrada na institución una parte fundamental de la so trayeutoria al estudiu y defensa de la cultura y la llingua asturianes.

La so obra contribuyó al desendolcu de l’antropoloxía n’Asturies, col estudiu de la organización social, los cambeos económicos, les creyencies y les rellaciones ente llingua, cultura ya identidá. Destaquen Antropoloxía llingüística: cultura, llingua y etnicidá (1994) y La cultura asturiana. Introducción a l’antropoloxía d’Asturies (2010), que contribuyeron a afitar l’asturianu como llingua d’investigación y de reflexón científica. Dientro de l’ALLA, esti llabor tien una de les sos espresiones principales na direición de Cultures. Revista Asturiana de Cultura, un espaciu d’estudiu antropolóxicu y etnográficu qu’amiesta l’atención a la realidá asturiana cola apertura a otres cultures.

La so proyeición internacional axunta la promoción de los estudios sobre Asturies cola defensa de la diversidá llingüística y cultural europea. Ye presidente de l’Asociación pa les Llingües y Cultures Europees Amenazaes (ALCEM) y presidió’l comité entamador del Congresu Mundial de Cultura Asturiana del 2025. Estes iniciatives amuesen el so papel como figura cabezalera nel intercambéu académicu y na presencia de l’antropoloxía y la cultura asturianes nel ámbitu internacional.