TP-82

TP-82
	; ; Ur bistolenn TP-82 gant he lamm-vachete hag he dafar
Kinnig
Bro	URSS
Doare	Pistolenn tri c'hanol da wintañ
Munisionoù	Kartouchennoù-chase 12,5 × 70 mm (kalibr 40); 5,45 × 39 mm M74;
Produer	Uzin armoù Toula
Mare-produiñ	1982 - 1987
Skouerennoù produet	Etre 30 ha 100 hervez ar mammennoù
Mare implij	1986 - deroù ar XXIañ kantved
Perzhioù teknikel
Mas (hep kartouchenn, gant he lamm)	2,4 kg
Hirder	360 mm (670 mm gant he lamm)
Hirder ar c'hanol	300 mm
Hed-tenn pleustrek	Etre 20 ha 30 m (evit ar c'halibr 40)
Lezenn
Rummad e Bro-C'hall	B

An TP-82 (rusianeg : трёхствольный пистолет, pistolenn tri c'hanol) a zo un arm-dorn dreistbevañ savet e 1981 e uzin armoù Toula (URSS) evit an egoraerien soviedel.

Istor

E miz Meurzh 1965 e oa distro an egoraer Aleksei Leonov eus an droiad Voshkod 2, met douaret e oa e glozenn egor e Siberia, pell diouzh ar skipailhoù a oa da gerc'hat anezhañ. D'ar poent-se e veze kaset pistolennoù damaotomatek Makarov evit dreistbevañ en natur betegoût e vije c'hoarvezet un darvoud a seurt-se gant an egoraerien. Leonov a remerkas e oa re wan ar Makarov evit talañ ouzh al loened bras a gaver e koadeier Siberia, bleizi, arzhed, tigred hag all^[1].

Deskrivadur

E 1971 e weladennas Leonov uzin armoù Toula, ha kontañ a reas e istor en embregerezh. E 1981 e voe savet un arm nevez eno, hag a voe asantet en ur mod ofisiel e 1982 evit an egoraerien^[2]. Ur bistolenn da wintañ e oa, dezhi daou ganol kalibr 40 (12,5 × 70 mm) evit chaseal a-dost loened bihan pe etre, hag ur c'hanol all kambret e 5,45 × 39 mm (munision an AK-74) evit gellet tennañ pelloc'h pe war loened brasoc'h^[1]. Choazet e voe ur sistem adkargañ dre zorn abalamour dezhañ bezañ fiziaploc'h evit hini ar sistemoù damaotomatek e hin yen Siberia. Gellet a rae ivez an arm tennañ fuzeennoù-argoll diouzh an ezhomm. Ul lamm a c'halle bezañ staget ouzh an TP-82, hag a oa enni ur machete evit troc'hañ koad^[2].

Implij

Implijet e voe an TP-82 adalek 1986 ha betek deroù ar XXI^añ kantved. Etre 30 ha 100 skouerenn anezhi a voe produet etre 1982 ha 1987 hervez ar mammennoù. Bremañ e vez choazet gant pep egoraer rusian peseurt arm-dreistbevañ e fell dezhañ kas gantañ, met war a seblant e vefe dilezet an TP-82 evit pistolennoù damaotomatek standartoc'h ha modernoc'h^[1].

Daveennoù

1 2 3 (en) PIKE Travis, TP-82 Cosmonaut Survival Pistol: Russia’s space gun (diellet), Sandboxx, 19/01/2022 (lennet d'an 30/10/2024)
1 2 (en) Astronaut survival weapons: TP-82 pistol, Topwar, 28/11/2013 (lennet d'an 30/10/2024)

Stag eo ar bajenn-mañ ouzh Porched an Armoù-tan

[:0-1] 1 2 3 (en) PIKE Travis, TP-82 Cosmonaut Survival Pistol: Russia’s space gun (diellet), Sandboxx, 19/01/2022 (lennet d'an 30/10/2024)

[:1-2] 1 2 (en) Astronaut survival weapons: TP-82 pistol, Topwar, 28/11/2013 (lennet d'an 30/10/2024)

[1]

[2]