Aciveiros

Aciveiros
Instancia de entidade singular de poboación
Localización  Situado en Lubián, provincia de Zamora, Castela e León, España  Coordenadas 42°02′21″N 6°52′27″O
Cifras e dimensións  Poboación    30 (2024)
Fontes e ligazóns Código postal 49574
Wikidata

Aciveiros (en castelán e oficialmente Aciberos) é unha localidade do concello de Lubián, na provincia de Zamora (Castela e León).

Situación

Encóntrase situado ao noroeste da provincia de Zamora, preto da provincia galega de Ourense e da rexión histórica portuguesa de Trás-os-Montes. Pertence ás Portelas ou Alta Seabra, unha subcomarca da bisbarra histórica e tradicional da Seabra.

Situado en plena rota do Camiño de Santiago Xabrés, o seu nome significa "o lugar dos acivros". Encóntrase arrodeado de bosques de carballos e breixos, aínda que tamén hai castiñeiros, algúns deles centenarios. É unha zona xenerosa en auga que recollen as súas múltiples fontes. Do seu patrimonio destaca a pequena ermida de Santa Ana, cunha bonita espadana con toques barrocos, e a súa igrexa parroquial da virxe do Carme. Tamén sobresae o seu rico patrimonio etnográfico, como os numerosos muíños de auga e fornos de cocer pan, todos eles datados entre os séculos XV e XVIII.

É unha das localidades bilingües da provincia de Zamora, xa que os seus habitantes utilizan habitualmente o castelán e o galego.

Patrimonio

Do seu patrimonio destaca:

• A igrexa parroquial da Virxe do Carme está situada á saída da aldea. Trátase dun edificio sinxelo, cun pequeno pórtico de tres arcos e cuberta en curva feita en cemento. Neste templo, os espazos do adro son utilizados como cemiterio.
• A ermida de Santa Ana atópase situada á entrada do lugar. De reducida dimensión, ten unha chamativa espadana con toques barrocos e pequeno vestíbulo aberto.
• Hai varios muíños de auga, un deles localizado na praza da Mallada e que está datado no século XV. Existen outros dous encóntranse na "sobre aldea" e datados en época posterior, cara ao século XVIII.
• Hai dous fornos de cocer pan, ambos os dous situados na praza da Mallada e na Porta da Rosalía. Estes foron datados nos séculos XV e XVIII, respectivamente.