魔法值
魔法值（常簡寫作 MP ，即英文 mana point、magic point，粵拼：粵化口語音：men1 naa2*4）係角色扮演遊戲成日用嘅機制，設計上屬於資源系統，用嚟代表遊戲角色有幾多「能量」或者「法力」淨，可以用嚟施展魔法。玩家消耗魔法值去使用咒語或者第啲特殊異能，法力冇晒就唔能夠再施展。魔法值呢個概念早喺一九九〇年代前就已經存在，後來成為咗電子角色扮演遊戲入便嘅標準元素。
|
廣義化嘅話，魔法值可以泛指遊戲角色使用特殊異能嗰陣要消耗嘅資源，而由於角色扮演遊戲傳統上多數採用奇幻嘅美術外觀，呢啲異能往往係包裝成咒語同魔法，所以呢個數值就稱為魔法值；若果隻遊戲採用科幻設定，噉嘅數值就可能會嗌做能量，但重點不變－都係有一個數值，反映角色淨低幾多虛擬資源可以用嚟使用特殊異能[1]。
喺粵港地區嘅中文，一般會用魔法值或者魔力值嚟指呢個概念，而喺粵語較日常化嘅口語之中，就可能會用魔法條或者藍條（顯示淨低幾多魔法值嘅長條，好多時都係藍色嘅）等嘅詞嚟指魔法值或者相關概念。
遊戲機制
[編輯]
喺多數 RPG 入便，魔法值係一種資源，用數值代表。每當角色施展咒語或者使用特殊技能嗰時，都會消耗一定量嘅法力。法力不足嗰陣，玩家就暫時用唔到需要法力先用到嘅技能，必須透過以下呢啲途徑嚟回復法力[2][3]：
魔法值系統可以令遊戲中嘅法術同異能使用更有策略性：玩家要喺戰鬥中平衡攻擊力、回復力同埋資源消耗，唔可以無限施法。
此外，噉嘅系統亦起到遊戲平衡嘅作用，例如較強勁較高級嘅咒語，要消耗大量法力先用得。所以即使去到遊戲後期，玩家學晒啲咒語又夠法力施展，喺某啲情況下佢依然可能有誘因去用較弱嘅初級咒語，節省法力[4]。
角色嘅最大魔法值（max MP；指最多可以持有幾多魔法值）往往會伴隨能力值上升而跟住升。去到遊戲後期，玩家控制嘅角色能夠使用初頭唔夠魔法值用嘅異能[2]，突顯角色嘅成長。
要留意嘅係，《魔法風雲會》等好多集換式咭遊戲會用嘅 mana 資源機制雖然個名類似，但係同典型 RPG 用嘅魔法值喺用法上有明顯差異。
遊戲例子
[編輯]唔同遊戲，對魔法值嘅處理方式都唔同。
喺《最終幻想》入面，魔法值係施放魔法咒語嘅資源，黑魔法、白魔法同時空魔法各有唔同嘅效果，包括係用火焰同雷電攻擊敵人、回復隊友嘅生命值同埋令到隊友行得快啲... 等等，不過無論邊種魔法，都要有足夠嘅法力至用得，而且愈強力嘅咒語，消耗嘅法力就愈多。
喺《艾爾登法環》入面，魔法值被稱為專注值（簡寫 FP）功能上近乎等同魔法值。玩家角色使用魔法或者特殊戰技嗰時都會消耗專注力。而玩家可以飲用藍色聖杯藥水嚟回復專注力。呢個系統將傳統 RPG 嘅魔法值機制融咗入去高難度嘅動作遊戲之中。
《小朋友齊打交》雖然係格鬥遊戲，都有使用魔法值噉嘅機制，角色普通出拳或者起腳踢對手唔洗消耗魔法值，但係使用特殊招式嗰陣就要。呢隻遊戲冇旅館嘅機制，角色嘅魔法值會隨時間而慢慢恢復。玩家亦可以執戰場上出現嘅啤酒樽，飲啤酒嚟回復魔法值。
喺最終幻想早期作品等較舊嘅作品之中，魔法值對於唔用魔法嘅職業嚟講係完全冇用嘅，所以屬於呢啲職業嘅角色，往往係冇魔法值，其最大魔法值為 0 [5]。而一九九〇年代中嘅 RPG 就較多會開始容許非魔法嘅角色有一定魔法值，例如喺艾爾登法環同相關遊戲之中，就算係非魔法系嘅角色，施展某啲特殊技能嗰陣都要用魔法值。
替代系統
[編輯]喺二十一世紀初，魔法值係 RPG 常用嘅資源系統，但亦有遊戲會採用第啲設計思路。
例如《最終幻想》頭嗰兩集，仲未採用魔法值嘅系統，而係用咗咒語次數。角色每個咒語只可以施展若干次，例如等級一咒語可以用三次、等級二咒語可以用兩次呀噉，用晒就要用魔法藥水或者去旅館休息先至可以回復。後來系列先至轉用數值型魔法值，更貼合電子遊戲嘅即時戰鬥節奏。
詞源考究
[編輯]據語源學考究，現代歐語會用嘅 mana 一詞本來係嚟自南島語系文化，意思大致可以理解為遍佈自然界嘅神秘力量。呢隻詞後來經人類學研究入咗去歐洲嘅眾語言嗰度，大致係用嚟指無形嘅靈性能量。後來呢隻詞喺二十世紀後半俾歐美嘅遊戲設計師攞咗去用，指遊戲角色施展魔法嗰陣要用嘅能量或者法力。截至廿一世紀初，呢隻詞已經成為咗打機用語嘅一部份。[4]
睇埋
[編輯]引咗
[編輯]- ↑ The History of Mana: How an Austronesian Concept Became a Video Game Mechanic.
- 1 2 Perry, Jim (2009-06-23). RPG Programming with XNA Game Studio 3.0. Jones & Bartlett Learning. p. 404. ISBN 978-1449631505. 喺2014-12-09搵到.
- ↑ Pederson, Roger (2009-06-23). Game Design Foundations. Jones & Bartlett Publishers. p. 153. ISBN 978-1449663926. 喺2014-12-24搵到.
- 1 2 "The History of Mana: How an Austronesian Concept Became a Video Game Mechanic", June 17, 2014, Alex Golub, Assistant Professor of Anthropology, University of Hawai'i at Mānoa.
- ↑ Adams, Ernest (2010-04-07). Fundamentals of Game Design. New Riders. pp. 469, 580. ISBN 978-0132104753. 喺2014-12-09搵到.
- ↑ Shannon Appelcline (2011). Designers & Dragons. Mongoose Publishing. p. 383. ISBN 978-1-907702-58-7.
_-_The_Noun_Project.svg)
