點 (幾何)

2D 歐幾里得空間嘅點

點（粵拼：dim2）係幾何學上嘅術語，即係代表一個空間入面嘅一個位置。

概論

睇埋：幾何學

點係幾何學上嘅一個原始諗法：

• 簡化噉講，點可以定義做「喺空間裡面有確切位置、唔佔用空間嘅嘢」，冇長度同闊度；
• 技術性啲噉講，現代數學有咗集合論，而喺呢套理論框架下，點通常俾人定義做「一個集（空間）入面嘅其中一件元素」，例如想講一塊平面上面嘅一點，首先就會定義塊平面係

  $\mathbb {R} ^{2}=\{(a,b):a,b\in \mathbb {R} \}$，

塊平面上嘅一點 $p$ 就係 $\mathbb {R} ^{2}$ 入面嘅元素；用日常用語講嘅話，即係 $p$ 可以寫做 $(a,b)$，當中 $a$ 同 $b$ 都係實數（$\mathbb {R}$）。值得一提嘅係，點原則上係一個抽象化嘅概念，淨係存在喺人嘅想像之中：理論上嘅點係冇長度同闊度嘅，而當一個人攞支筆畫一粒肉眼睇得到嘅點嗰陣（好似下圖噉），嗰點查實經已有返咁上下長度同闊度，所以人先可以用肉眼睇得到，嚴格嚟講唔可以算係一點，頂嗮攏只可以算係攞嚟表示一點嘅符號。

點係幾何學最根基嘅諗頭－有咗點嘅概念，就有得定義同闡述第啲重要嘅幾何學概念同諗法，例如「是但兩點之間，都可以畫條獨一無二嘅線」呢條公理噉。

睇埋

• 線 (幾何)
• 面 (幾何)
• 體 (幾何)
• 普卡點