Sanae Takaichi
.svg){kind=logo}
Sanae Takaichi (Nara, Japonia, 1961eko martxoaren 7a) idazlea, analista, telebistako aurkezlea eta politikaria da.[1] 2025eko urriaren 21ean, Japoniako lehen ministro izendatu zuten, kargu hori bete duen lehen emakumea.[2][3]
2025etik, Alderdi Liberal Demokratikoko presidentea da. 1993tik 2003ra eta 2005etik aurrera, Ordezkarien Ganberako kide da. Shinzo Abe eta Fumio Kishidaren gobernuetan hainbat ministerioren buru izan zen. Ideia ultrakontserbadoreak ditu.
Bizitza
[aldatu | aldatu iturburu kodea]Naran jaio eta hezi zen. Ama polizia zuen eta aita kotxe fabrika bateko langilea.[4][5] Kobe Unibertsitatean graduatu zen.
Ibilbide profesional eta politikoa
[aldatu | aldatu iturburu kodea]1987 eta 1989 urteen artean AEBn egon zen lanean, Patricia Schroeder demokratari lagunduz Kongresuan.[4]
Japoniara itzuli zen 1989an eta analista eta idazle gisa lan egin zuen, AEBn ikasitakoa aprobetxatuz. Urte hartan bertan TV Asashi kateko aurkezle lanetan hasi zen.
1993an independente gisa aukeratu zuten Ordezkarien Ganberarako eta 1996an Alderdi Liberal Demokratikoko kide egin zen.[5]
Shinzo Aberen gobernuetan goi mailako karguak bete zituen. Besteak beste, Barne Arazoetarako eta Komunikaziorako Ministro.
2021ean alderdia zuzentzeko hautagai gisa aurkeztu zen, baina ez zuen irabazi.
2022 eta 2024 urteen artean Ekonomiaren Segurtasunerako Estatu Ministro izan zen, Fumio Kishidaren gobernuan.
2024an berriro aurkeztu zen alderdiko presidente izateko lehiara. Lehen itzulian lehen postua lortu zuen, baina bigarren itzulian Shigeru Ishibak irabazi zion.
Azkenik, 2025ean berriro aurkeztu zen eta bi itzulietan irabazi zuen, alderdiko presidente kargua lortuz.[6][7][8]
2025eko urriaren 21ean Japoniako Lehen Ministro izendatu zuten, kargu hori bete zuen lehen emakumea.[2]
Ideia politikoak
[aldatu | aldatu iturburu kodea]Nippon Kaigi eskuin muturreko erakunde ultranazionalistako kidea da.
Askotan aipatzen du Margaret Thatcher bere eredu gisa.[4]
Inmigrazioaren kontrako iritziak ditu eta mugak gogortzearen alde dago. Helburu ekonomikoengatik asiloa eskatzen dutenak herrialdetik kanporatu nahi ditu.[9] Gainera, Txina bezalako herrialdeetako ikasleei Japoniara sartzea debekatu nahi die, Japoniako jakintza militarrak euren herrira eraman ez ditzaten.
Ekonomiari dagokionez, uste du gobernuak sektore estrategikoak bultzatu behar dituela.[10] Adibidez, inteligentzia artifiziala, semikonduktoreak, fusio nuklearra, bioteknologia eta armagintza. Korporazio handiei zergak igotzearen alde ere badago.
Gizarteko gaien inguruan iritzi ultrakontserbadoreak ditu. 2020an gobernuak lege bat onartu zuen ezkonkide bakoitzak bere abizena mantendu ahal izateko. Takaichi kontra agertu zen, familian oinarritutako gizarte egitura suntsituko zuelakoan.[4][11] Emakumeak enperadore izatearen aurka ere azaldu da. Baita sexu berdinekoen ezkontzen kontra ere.[5] Hala ere, orientazio sexual edo genero identitate desberdinak ulertzearen alde dago.
Japoniako bandera kaltetzen dutenak kartzelan sartu nahi ditu, eta gobernua kritikatzen duten komunikabideak zigortu ere bai.
Kanpo politikari dagokionez, Japoniako Konstituzioaren 9. artikulua aldatu nahi du.[12] Artikulu honen arabera, Japoniak ezin du gerrarik egin bere kanpo arazoak konpontzeko. Txinarekiko dependentzia ekonomikoa txikitu nahi du. Eta Taiwanera bisitak egin ditu eta esan du herrialde honen arazoak Japoniarenak ere badirela.
Japoniak Bigarren Mundu Gerran egindako krimenak esajeratu egin direla uste du, eta Mukdengo istiluaren ondoren Japoniak egindako gerra autodefentsarako izan zela ere ziurtatu du.[4]
Bizitza pertsonala
[aldatu | aldatu iturburu kodea]Taku Yamamoto politikariarekin ezkonduta dago eta, harekin umerik eduki ez badu ere, aurretik hark beste emakume batekin edukitako hiru umeak adoptatu ditu.
Erreferentziak
[aldatu | aldatu iturburu kodea]- ↑ «TAKAICHI Sanae | Liberal Democratic Party of Japan» www.jimin.jp (kontsulta data: 2025-10-06).
- 1 2 «Sanae Takaichi kristalezko sabaia hautsi du eta Japoniako lehen ministro izan den lehen emakumea da» orain.eus (kontsulta data: 2025-10-21).
- ↑ Perez, Igor Baigorri. (2025-10-21). «Japoniak lehen ministro emakume bat izango du, historian aurrenekoz» Berria (kontsulta data: 2025-10-22).
- 1 2 3 4 5 (Ingelesez) Sanae Takaichi Is Likely to Be Japan’s Next Leader. Who Is She?. 2025-10-04 (kontsulta data: 2025-10-06).
- 1 2 3 (Ingelesez) «Who is Japan's 'Iron Lady' Sanae Takaichi?» www.bbc.com 2025-10-04 (kontsulta data: 2025-10-06).
- ↑ (Ingelesez) Kelly, Tim; Geddie, John; Sugiyama, Satoshi. (2025-10-05). «Right-wing Sanae Takaichi set to be Japan's first female premier» Reuters (kontsulta data: 2025-10-06).
- ↑ Etxeberria, Aitor Garmendia. (2025-10-04). «Sanae Takaichik bidea irekia du Japoniako lehen ministro izateko» Berria (kontsulta data: 2025-10-06).
- ↑ «Emakume batek lortuko du lehen aldiz Gobernuaren buruzagitza Japonian: Sanae Takaichi historia egiten» orain.eus (kontsulta data: 2025-10-06).
- ↑ Solano, Josep. (2025-10-03). «Immigrazioaren auzia puri-purian Japonian, primarioen atarian» Berria (kontsulta data: 2025-10-06).
- ↑ (Ingelesez) Ninivaggi, Gabriele. (2024-09-25). «Does Sanae Takaichi have a real shot at becoming Japan's first female leader?» The Japan Times (kontsulta data: 2025-10-06).
- ↑ (Ingelesez) Maslow, Sebastian. (2025-10-05). «Is Sanae Takaichi Japan’s Margaret Thatcher – or its next Liz Truss?» The Conversation (kontsulta data: 2025-10-06).
- ↑ (Ingelesez) Jie, Lim Hui. (2025-10-06). «Who is Sanae Takaichi? The first woman set to helm the Japanese government» CNBC (kontsulta data: 2025-10-06).
Kanpo estekak
[aldatu | aldatu iturburu kodea]| Autoritate kontrola |
|
|---|
Datuak: Q1705028
Multimedia: Sanae Takaichi / Q1705028
