Ohcejoga oktasašvuovddi čullet dál Muttošjávrri duohken Anára gielddas badjelaš 200 hektára viidosaš guovllus. Dat guoskaha Muotkeduoddara ja Muttošjávrri bálgosa guohtumiid.
Ovttasbargu Muotkeduoddara bálgosiin lea doaibman, muitala Ohcejoga oktasašvuovddi ságadoalli Veikko Porsanger.
– Mii leat dahkan vuovdeplána, mas guovllu boazodoallu lea váldon vuhtii. Vuovdečuollan ollašuhtto dan rávvaga mielde.
Vuovdeplána meroštallá dan mo galgá vuovddi čuollat.
Muttošjávrri bálggus ii sáhte vel dohkkehit čuollanplána dákkárin. Bálggus oaččui dieđu plánas easkka ođđajagimánu loahpas ja bálgosis oidnet, ahte dan sáhttá guorahallat albma láhkai easkka bievlla áigge.
Muttošjávrris lea sullii 7,5 hektára sturrosaš guovlu, gos áiggošedje čuollat muoraid.
– Dat lea boares lahppovuovdi ja Muttošjávrri bálgosa dehálaš guohtuneana, dadjá bálgosa boazoisit Osmo Seurujärvi.
Metsä Groupis oidnet ovttasbarggu boazodoaluin vealtemeahttumin
Muotkeduoddara bálggus fas lea dohkkehan vuovdeplána, mas boazodoallu lea váldon vuhtii vuovdečuollamiin.
Muotkeduoddara bálgosa boazoisit Janne Kitti rámida ovttasbarggu Ohcejoga oktasašvuovddi hálddašeddjiiguin. Vejolaš čuolmmaid birra ságastallet ja sohpet ovttas.
– Boazodoallu leat čuollanplánas váldon vuhtii eanet go goassige ovdal. Lahppomuorat sestojuvvojit ja čuollanbázahusaid guđđet luotta ala vai dat moallanit dohko, Kitti čilge.
Vuovdečuollamiin sullii 30 hektára guovllus čullet nu gohčoduvvon čoagginvugiin, su. poimintahakkuu, mas boazodoalloguovllus guđđet boares lahppomuoraid bohccuid biebmun ja siepmanmuorran. Nuorat siepmanmuoraid čullet eret ođđa muorrašattu ovddas.
– Boazodoalloguovllus leat dehálaš čuollat vuovddi dálvit, vai eana ja jeahkálat seilot, muittuha Metsä Group birehoavda Jarkko Parpala.
Parpala deattuha ovttasbarggu boazodoalliiguin go čullet vuvddiid boazodoalloguovllus.
– Go ohcet oktasaš oainnu, de eai váttisvuođat boađe. Mii basttit buorre ovttasbargui bálgosiiguin ja boazodoaluin, go lea beare miella dasa.
Sámeguovllus vuovdečuollamat leamašan Eanodagas, Vuohčus ja Anáris. Anára gielddas meahccit leat nuppeláganat go Eanodagas ja Soađegili guovllus - Eanodagas ja Soađegilis lea nuorat vuovddit, Anáris fas leat olu boares čuolakeahtes vuovddit.
– Dajašin, ahte Eanodagas ja Soađegili sámeguovllus eai leat jur leamašan váttisvuođat vuovdečuollamiiguin, Parpala oaivvilda.
Anára gielddas go oastá muoraid, de ferte maid vihkkehallat krihtalaččat dan, leago dat gánnehahtti guhkes mátkkiid dihte.
– Muorragávpi lea gánnehahtti dalle go vuovdis ja oastis lea goittot oktasaš oaidnu hattis, oaidná Jarkko Parpala.
”Lea dego báŋkokontto bijašit gitta, it oaččo iežat ruđaid geavahit”, oaivvilda vuovdeeaiggát
Ohcejoga oktasašvuovddis leat sullii 1 000 osolačča ja dat eaiggáduššet oktiibuot 13 000 hektára vuovddi Anára gielddas.
– Oktasašvuovdi lea suodjalussii vuovdán vássán jagiid áigge sullii 900 hektára, muitala Veikko Porsanger.
Ohcejoga oktasašvuovddi osolaččat besset juohkit ruđa, go vuovdi čullojuvvo.
– Dat lea dego báŋkokontto bijašit gitta, ja it oaččo iežat ruđaid geavahit. Áidna, gos mii fidnet ruđa, lea justa dat vuovdečuollan.
