Yle Sámi guhkesáigásaš hoavda Juhani Nousuniemi lea čállán girjji, mas muittaša sihke eallimis ja iežas barggu doaimmaheaddjin ja maŋŋelabbos sámerádio vuosttaš hoavdan. Nousuniemi ii lean plánen čállit girjji, muhto das šattai girji, go son lei álgán čállit muitalusaid iežas máná guoktá várás.
Radio-Jussenge gohčoduvvon Niillasaš-Jovnna Máreha Jusse lea bajasšattan Gáregasnjárggas. Son ii beassan gazzat oahpu sámegillii ja easkka universitehtas oahpai čállit iežas eatnigiela. Son lohkáge, ahte sámerádio lea dehálaš sámegielaid dáfus.
Vaikko girjjis son gieđahallá iežas bargguid sámerádios, de ii girji leat dušše beare sámeradio historjjás baicca das, mo son lea oaidnán sámeradio doaimma ja mo ieš vásihan dan.
– Sámeradios ledje miehte- ja vuostebiekkat. 1970-logushan sámeradio lei viehka unna resurssain. Oaivil lei ahte galggašii oažžut lasi olbmuid bargui 1980-logus, muitala Nousuniemi.
Álgojagit golihedje radioorganisašuvnna huksemiin
Nousuniemis šattai Yle Sámi vuosttas hoavda jagis 1985. Dan ovdal son lei moanáid jagiid jo bargan doaimmaheaddjin. Son muitala, ahte álgojagiid lei olu huksenbargu.
– Geahččalit oažžut áddejumi Helssegis sámegielat radioprográmmii. Ovdamearkka dihtii go geahččalin oažžut anárašgielat prográmmaid oažžut johtui, de Pekka Silvola, stuorra hoavda Yleisradios, logai ahte ii son leat gullange dakkár gielas, muittaša Nousuniemi.
Son goittot ii vuollánan dainna, muhto dáhtui Pekka Sammallahtis duođaštuša das, ahte anárašgiella lea iežas giella. Ja nu anárašgielat prográmmatge álge 1982:s.
Stuorra bargu lei maid skuvlet veahkkebargiid dahkat prográmmaid, álggos prográmmaid dahke eanaš freelancerat. 1970-logus sámegielat prográmmat gullojedje sullii moadde diimmu vahkus. Maŋŋá go sámeradio 1991:s oaččui iežas radiokanála, de vahkkosaš sáddenáigi lei jo máŋgalot diimmu.
Suomagielat girji almmustuvvá bearjadaga
Nousu-Jussi – Saamelaisen radioveteraanin muistelmat -girjji almmustahttindilálašvuohta dollo Sámemusea Siiddas bearjadaga.
Girjji goasttida Kustannuspuntsi-nammasaš fitnodat, man duohken lea earet eará historjádutki Veli-Pekka Lehtola.
Girjjis son ii muital beare sámeradio historjjás, muhto juogada vásáhusaidis dološ Gáregasnjárggas. Nousuniemi girji lea čállon suomagillii, muhto dasa lea sivva.
– Mishan eai leat mahkkige veahkkeruđat, mii fertet bastit vuovdit daid girjjiid. Sámegielat girjjiid vuovdimin ii dáiddeš dinet daid goluid ruovttoluotta.
Son ii vuos máhte dadjat, almmustuvvágo dán girjjis sámegielat veršuvnna.
