Dieđihanáigi Sámi Grand Prix -gilvui lea jotkojuvvon. Lávlaga dahje luođi sáhttá almmuhit mielde gilvui golggotmánu 8. beaivve rádjái. Álggos áigemearri lei čákčamánu loahpas. Diibmá áigemearri lei easkka skábmamánus.
Gilvvu buvttadeaddji Ol Johan Gaup muitala, ahte sii háliidit addit vejolašvuođa vel artisttaide ja juigiide sáddet sisa lávlagiid ja luđiid ja ráhkkanit gilvui.
– Mii leat dán jagi mihá árabut gidden dieđihanáigemeari go ovddit jagiid. Mii geahččalit dáinna lágiin bargat boahtte jagi Sámi Grand Prix artisttaiguin ja juigiiguin guhkit áigge. Dahkat Sámi Grand Prixa vel buorebun.
Sámi musihkkafestivála, NRK, SVT ja Yle háliidit maid čilget artisttaide ja juigiide maid Sámi Grand Prixii oassálastin mearkkaša.
Lávlagat ja luođit galget leat originála komposišuvnnat, eaige dat oaččo leat almmuhuvvon ovdalaččas. Gaup muitala, ahte máŋgii ođđa artisttat leat gávdnon Sámi Grand Prix -gilvvu dieđiheamis.
– Leat máilmmi ollu lávlagat ja luođit, mat dahkkojuvvojit jagis jahkái, maid livččiimet háliidit gullat ja maid Sápmi livčče maid ánssášit gullat.
Dán rádjái leat boahtán moaddelot dieđiheami, muitala Gaup.
Sámi Grand Prix -gilvu lágiduvvo Guovdageainnus lávvardaga njukčamánu 20. beaivve 2027. NRK, SVT ja Yle sáddejit ovttasbarggus njuolggosáddaga gilvvus.
Dieđihanáigemeari dievvama maŋŋá árvvoštallet guldalanjoavkkut bihtáid. Fágajoavku, man Sámi musihkkafestivála ja sáttaásahusat leat čohkken, vállje daid geat besset viidáseappot gilvui. Artisttat almmuhuvvojit dálvvi áigge.
Luođi ja lávlaga sáhttá sáddet neahttasiiddu bokte dahje šleađgapoasttain Sámi musihkkafestiválii.
