Sámiid duohtavuođa- ja soabadankommišuvnna ávžžuhusaid árvvoštalli parlamentáralaš bargojoavkku váldočálli Antti Rinne lea máhccan duorastaga riikabeivviide.
Vel ii leat diehtu gii boahtá Rinne sadjái bargojoavkku váldočállin, muhto bargu goittot ovdána, dadjá stáhtaráđi kansliija strategiija ossodaga hoavda Harri Martikainen.
– Antti Rinne jođihan bargu ovdána áigedávvalis, váikko son máhccáge riikkabeivviide. Smávva ádjáneapmi ii váikkut barggu ovdáneapmái, dadjá Martikainen.
Martikainen dadjá, ahte sii sáhttet doallat koordineren- ja čuovusjoavkku čoahkkimiid ja sámediggelágas mearriduvvon ráđđádallamiid nu, ahte bargu gárvvistuvvá plánejuvvon mearreáiggis.
Váldočálli namuhit politihkalaš vuogi mielde.
– Mun in máhte njuolgga dadjat gii vállje váldočálli Rinne sadjái. Dat lea várra politihkalaš mearrideaddji, gii dahká dan kollegiála hámis, oaivvilda Martikainen.
Sámediggi ja Nuortalaččaid siidačoahkkin leat mielde parlamentáralaš bargojoavkku koordinašuvdna- ja čuovvunjoavkkus.
Sámedikki ságadoalli Pirita Näkkäläjärvi sávvá Antti Rinnei lihku riikkabeaiáirasa bargui ja giitá su barggus parlamentáralaš bargojoavkku váldočállin.
Näkkäläjärvi muitala, ahte Sámediggi sávvá duohtavuođa- ja soabadankommišuvnna doaibmabidjoevttohusaid árvvoštallanbarggu ovdánit seamma málle mielde go ovdalge, váikko váldočálli molsašuvvá. Sávaldat lea maiddái, ahte prosessii eai dan dihtii boađe hehttehusat.
– Ášši lea sámi álbmogii hui dehálaš ja joatkkabarggu áigetávval lea hui čavga, muitala Näkkäläjärvi.
Sámediggi lea bidjan olu návccaid duohtavuođa- ja soabadankommišuvnna doaibmabidjoevttohusaid árvvoštallamii dán čavčča. Näkkäläjärvi muitala, ahte ášši leamašan válmmaštallamin stuorra joavku Sámedikki hálddahusas, stivra ja lávdegottit, ja son lea maid ieš vuoruhan duohtavuođa- ja soabadanproseassa joatkkabarggu olu.
Nuortalaččaid ovdaolmmoš Veikko Feodoroff mielas lea váivi, ahte Rinne guođđá dehálaš barggu gaskan. Son muitala, ahte sis leat garra vuordámušat ođđa váldočállái, guhte gártá njuiket fárrui bargui mii lea gaskan.
– Berre leat oahpásnuvvan duohtavuođa- ja soabadankomišuvnna loahpparaportta sisdollui ja čielggadusaide, vai bastá daid vuoiŋŋas áššiid ovddidit, muitala Feodoroff.
Feodoroff mielas livččii buorre, ahte váldočálli livččii sápmelaš.
– Livččii goittot kulturduogáš. Nama in máhte árvalit, muitala Feodoroff.
Sápmelaččaid duohtavuođa- ja soabadankommišuvnna ávžžuhusaid árvvoštalli parlamentáralaš bargojoavkku doaibmabadji nohká 2027 njukčamánu gaskkamuttus go loahparaportta lea gárvvis. Raporttas árvvoštallet, makkár doaimmaid stáhta galgá ollašuhttit Sápmelaččaid duohtavuođa- ja soabadankommišuvnna evttohusaid vuođul.
Veikko Feodoroff muitala, ahte parlamentáralaš bargojoavku lea mearrediđolaččat gieđahallan evttohusaid, muhto vel eai leat nákcen čielgasit čujuhit konkrehtalaš buoridanevttohusaid eaige resurssaid.
