Sámeguovllu searvegottit leat geargamin boahttevaš searvegotteválggaid evttohasásahallamiin. Ohcejogas ii šatta searvegodderáđi válga go evttohasat leat seamma olu go maid leat báikkit.
– Searvegodderáđis leat gávcci báikki ja mis leat gávcci evttohasa. Dát dárkkuha, ahte buot evttohasat válljejuvvojit nu ahte sáhka lea nu gohčoduvvon soabatválggain, muitala girkohearrá Anu Sorjonen.
Ohcejoga searvegodderáđi evttohasat leat Jouni-Esa Nousuniemi Gáregasnjárggas, Kirsti Guttorm Áitejogas, Maarit Harjunen Nuvvosis, Oskari Kontio Njuorggámis, Väinö Guttorm Ohcejogas, Pekko Rauhala Ohcejogas, Tarja Halonen Ohcejogas ja Ursula Waltari Ohcejogas.
Eanodagas leat 14 evttohasa, geain válljejit 11 ja Soađegilis 37 evttohasa, geain válljejit 21. Soađegilis erenomáš lea, ahte Vuohču guovllus ii leat oktage evttohas.
Eanodagas evttohasat leat Guovddášbellodaga listtus Ulla Keinovaara, Miia Ahlholm, Sari Norrgård ja Eveliina Kurvinen, Johtti Sápmelaččat listtus Antti-Oula Juuso ja Anne Näkkäläjärvi sihke searvegoddelaččat Tuija-Maria Alamattila, Paavo Isohanni, Heli Kolehmainen, Liisa Laakso-Ranta, Lilja Nyrhinen, Leena Palojärvi, Riitta Peltovuoma ja Erkki Sankala.
Anára searvegotti evttohasaid namaid eai leat vel almmustahttán
Anáris evttohasat leat maid doarvái, muhto dárkilut dieđuid muitalit easkka go dievasmahttináigi nohká boahtte vahku loahpa bealde.
Anára ja Ohcejoga searvegottiide válljejuvvo vel Davvi-Sámi searvegotteovttastumi oktasaš váldostivrra ja dihto mearri báikkiin gullá Ohcejohkii.
– Davvi-Lappi searvegoddeovttastumi oktasaš girkostivrii leamaš ovdal vihtta lahtu Ohcejoga searvegottis válljejuvvon. Ja dál orru leamen nu, ahte válljejuvvojit dušše njeallje. Dohko leat guhtta evttohasa nu, ahte doppe mii beassat gal álgit jienastit, dadjá girkolaš luohttámušolmmoš Väinö Guttorm.
Davvi-Lappi searvegoddeovddastumi oktasaš girkostivraevttohasat Ohcejoga searvegottis leat Jouni-Esa Nousuniemi, Maarit Harjunen, Oskari Kontio, Väinö Guttorm, Pekko Rauhala ja Tarja Halonen.
Nuoraid beroštupmi searvegoddebargui lea lassánan. Skábmamánu searvegoddeválggain Suomas leat sullii 10 700 evttohasa, ja vuollái 30-jahkásaš evttohasaid mearri lea olu lassánan. Ovdamearkan Máttá-Suoma stuorra searvegottiin nuorra evttohasaid mearri lea juoba goalmmádas.
Searvegoddeválggat dollojuvvojit 15.11.2026 ja dan ovdal lea maid ovdajienastusvejolašvuohta 3.–7.11.
Divvojuvvon 26.9. dii. 7.45: Kirsti Guttorm ja Ursula Waltari eaba leat evttohassan Davvi-Lappi searvegoddeovttastupmái. Dii. 6.03 lei divvojuvvon boastut, ahte sáhka livččii lean searvegodderáđis.
