Luka

Umusi umwe Yesu yari ahantu ariko arasenga. Ahejeje, umwe mu bigishwa biwe aramubwira ati: “Mugenzi, twigishe gusenga, nk'uko Yohana yigishije abigishwa biwe.”
2 Arababarira ati: “Ni mwasenga, muvuge muti: 'Data, izina ryawe ni ryubahwe, ubwami bwawe ni buze;
3 imisi yose uduhe ivyo kurya bidukwiye.
4 Uduharire ivyaha vyacu, kuko natwe duhebera abari n'imyenda yacu bose; kandi ntutujane mu bitwosha nabi.”
5 Arababwira ati: “Ni nde muri mwebwe afise umugenzi yoja i we mu gicugu, akamubwira ati: “Mugenzi wanje, ngurana udutsima dutatu,
6 kuko haje umugenzi wanje avuye ku rugendo, nanje ntagira ico ndamuzimana.”
7 Uwo mu nzu yomwishura ati: “Sigaho kungora, namaze kwugara, kandi turi kumwe n'abana banje ku buriri, sinshoboye kuvyuka ngo ndayiguhe.”
8 Ndababwire, Naho atovyurwa n'uko ari umugenzi wiwe ngo ayimuhe, ariko kuko atagize isoni zo kumugobera, aravyuka, akamuha ivyo agomba vyose.
9 Nanje ndababwire; Musabe muzohabwa; murondere muzoronka; muramutse muzokwugururirwa.
10 Kuko uwusaba wese ahabwa; uwurondera aronka; uwuramutsa yugururirwa.
11 Canke muri mwebwe hari umuvyeyi umwana wiwe yomusaba umutsima, akamuha ibuye; canke yomusaba ifi, akamuha inzoka;
12 canke yomusaba irigi, akamuha sikorupiyo?
13 None mwebwe, ko muzi guha abana banyu ingabire nziza muri babi, mbega So wo mw'ijuru ntazorushiriza rwose guha Mpwemu Yera abamumusavye?
14 Kandi yirukana mu muntu dayimoni itera uburagi. Iyo dayimoni imuvuyemwo, uno muntu w'ikiragi aravuga; ishengero riratangara.
15 Ariko bamwe muri bo baravuga bati: “Beyezebuli, umukuru w'abadayimoni, ni we amushoboza kwirukana abadayimoni.”
16 Abandi bamuronderako ikimenyetso kiva mw'ijuru, bamugeza.
17 Na we amenye ivyo biyumvira, arababwira ati: “Ubwami bwose iyo bwitandukanije ubwabwo burahona, n'inzu, iyo yitandukanije, iragwa.”
18 Na Satani, namba yitandukanije ubwiwe, ubwami bwiwe buzorama bute? Kuko muvuga yuko Beyezebuli ari we anshoboza kwirukana abadayimoni.
19 Ariko jewe namba Beyezebuli ari we anshoboza kwirukana abadayimoni, abana banyu bashobozwa na nde kubasenda? Ni co gituma ari bo bazobatsindisha.
20 Ariko urutoke rw'Imana ni rwaba ari rwo runshoboza kwirukana abadayimoni, noneho ubwami bw'Imana burabashikiriye.
21 Umuntu w'inkomezi afise ibirwanisho iyo ateramiye urugo rwiwe, ibintu vyiwe biba amahoro;
22 ariko uwumurusha inkomezi iyo aramutse amuteye, akamunesha, amwaka ivyo arwanisha vyose yari yizigiye, akanyaga ibintu vyiwe, akabigaba.
23 Uwutamperereyeko aba ari umwansi wanje, kandi uwudafatanije nanje kwegeranya aba asanzaje.
24 Iyo impwemu ihumanye ivuye mu muntu, ica ahatagira amazi, irondera uburuhukiro, ikabubura, ikavuga iti: “Reka nsubire mu nzu yanje navuyemwo.”
25 Ihashitse, igasanga ikubuye, iteguritse.
26 Igaca igenda, ikazana izindi mpwemu indwi ziyirusha ububi, zikinjira, zikahaba. Ivya nyuma vy'uwo muntu bikarusha ivya mbere ububi.
27 Yesu akivugana n'Ishengero umugore umwe ashira ijwi hejuru aramubwira ati: “Irahiriwe inda yakuvyaye, n'amabere yakwonkeje.”
28 Na we aramwishura ati: “Canecane hahiriwe abumva ijambo ry'Imana bakaribungabunga.”
29 Ishengero rimaze kugwirirana atangura kubabwira ati: “Abo iki gihe ni abantu babi; barondera ikimenyetso, ariko nta kimenyetso bazohabwa, atari ikimenyetso ca Yona.”
30 Nk'uko Yona yabaye ikimenyetso ku Banyaninewe, ni ko Umwana w'umuntu azoba ku b'iki gihe.
31 Umwamikazi w'igihugu c'i Sheba. Azovana hasi n'abagabo b'iki gihe ku musi w'imanza, azobatsindisha; kuko yavanywe ku mpera y'isi no kwumva ubwenge bwa Salomo; kandi raba, uwuruta Salomo ari hano.
32 Abagabo b'i Ninewe bazovana hasi n'abo iki gihe ku musi w'imanza, babatsindishe; kuko bihanye aho bumviye ubutumwa buvuzwe na Yona; kandi raba, uwuruta Yona ari hano.
33 Nta wodomeka itara ngo arishire mu mwobo, canke ngo aryubikeko igiseke, ariko arishira ku gitereko caryo, ngo abinjira basange habona.
34 Itara ry'umubiri wawe n'ijisho ryawe. Ijisho ryawe iyo ari ryiza, umubiri wawe wose uba uri n'umuco; ariko iyo rirwaye, umubiri wawe uba uri n'umwiza.
35 Nuko rero ugabe umuco uri muri wewe ntube umwiza.
36 Kandi umubiri wawe wose ni waba uri n'umuco, ata gice na kimwe gifise umwiza, wose uzoba uri n'umuco, nk'uko ukwaka kw'itara kukuboneshereza.
37 Akibivuga, Umufarisayo aramuhamagara ngo amuzimane. Arinjira, aricara ngo arye.
38 Wa Mufarisayo abonye atabanje gukaraba atararya biramutangaza.
39 Umwami Yesu aramubwira ati: “Erega mwebwe Abafarisayo mwoza inyuma y'igikombe n'inkoko, ariko imbere muri mwebwe mwuzuye ubwambuzi n'ububi.”
40 Mwa bijuju mwe, iyaremye urukoba si yo yaremye n'imbere?
41 Ariko Muzotange ibiri imbere mu gikombe no mu nkoko mubitangishijwe n'ubuntu, kandi umve, vyose bizobabera ibiziruwe.
42 Ariko muzobona ibara, Bafarisayo, kuko mutanga icacumi c'imbwija, ico isogi n'ico imboga zose, ariko ubutungane n'ugukunda Imana mukavyirengagiza. Ivyo mwari mukwiye kubikora, vya bindi na vyo ntimubireke.
43 Muzobona ibara, Bafarisayo, kuko mukunda intebe z'icubahiro mu nsengero, no kugirwako bwakeye mu kibanza c'amakoraniro.
44 Muzobona ibara, kuko musa n'imva zitamenyekana, abantu bakazicako batabizi.
45 Umwe mu bigisha ivyagezwe aramwishura ati: “Mwigisha, ko uvuze utyo, natwe uradututse.”
46 Na we ati: “Namwe abigisha ivyagezwe muzobona ibara, kuko mwikoreza abantu imitwaro itokwikorerwa, namwe ubwanyu iyo mitwaro ntimuyikozeko urutoke na rumwe.”
47 Muzobona ibara, kuko mwubakira imva z'abavugishwa n'Imana, ba sogokuruza banyu ari bo babishe.
48 Uko ni ko mwiyagirije, kandi mwemeye ivyo ba sogokuruza banyu bakoze, kuko ari bo babishe, namwe mububakira imva.
49 Ni co catumye Imana ivugisha ubwenge bwayo iti: “Nzobatumako abo mvugisha n'intumwa, bamwe muri bo bazobica, abandi bazobahama,
50 ngo amaraso y'abavugishwa n' Imana bose yavishijwe, uhereye ku kuremwa kw'isi, aronderwe ku b'iki gihe,
51 uhereye ku maraso ya Abeli, ukageza ku maraso ya Zakariya yiciwe hagati y'igicaniro n'ahera h'urusengero: ni koko, ndababwire, azoronderwa ku b'iki gihe.”
52 Muzobona ibara, abigisha ivyagezwe, kuko mwatwaye urupfunguruzo rw'ubwenge; ntimwinjiye ubwanyu, n'abagomba kwinjira mwarababujije.
53 Maze asohotse, abahinga b'ivyanditswe n'Abafarisayo batangura kumusugereza no kumwiyandagazako ngo bamuvugishe vyinshi,
54 bamutega ngo bafate ijambo bokwumva avuga ngo bamurege.